တၢ်ဂ့ၢ်ခီၣ်ထံးခီၣ်ဘိ- http://karennews.org/2016/02/end-of-funding-will-force-ei-tu-hta-karen-displaced-peoples-camp-to-close.html/
ကျိၣ်စ့ဆီၣ်ထွဲမၤစၢၤလၢပှၤလီၢ်ကမှံဖိအိၣ်လၢအံသူၣ်ထၣ်ဒဲက၀ီၤလၢအကထိတဖၣ်အဂီၢ်ဘၣ်ကွၢ်ဆၢၣ်မဲၥ်ဒီးခါဆူညါတၢ်လီၤပျံၤလီၤဖုးမ့ၢ်လၢကျိၣ်စ့မၤစၢၤကပတုၥ်ကွံၥ်၀ဲဖဲလါစဲးပထ့ဘၢၣ် ၂၀၁၇အပူၤန့ၣ်လီၤ.
ကညီတၢ်ကစီၣ်ဒိးန့ၢ်ဘၣ်တၢ်ကစီၣ်လၢကျိၣ်စ့မၤစၢၤလၢတၢ်အီၣ်အဂီၢ်လၢပှၤကညီဃ့ၢ်မှံဟးဖျိလၢအိၣ်ဆိးလၢလီၢ်အိၣ်ကမှံဒဲက၀ီၤပူၤတဖၣ်ကပတုၥ်၀ဲန့ၣ်လီၤ.
အံသူၣ်ထၣ်ဒဲက၀ီၤအိၣ်သူၣ်လီၤသးလၢဃိၣ်လိၥ်ကျိကၢၢ်နံၤလၢဖၣ်ပူၣ်ကီၢ်ရ့ၣ်, ကညီကီၢ်စဲအကလံၤစိးတကပၤဒီးမ့ၢ်ဟံၣ်လၢပှၤလီၢ်အိၣ်ကမှံဖိအါမးအိၣ်၀ဲ ၃,၄၀၀ ဂၤလၢဘၣ်ဃ့ၢ်မှံဟးဖျိးလၢကီၢ်ပူၤတဖၣ်အတၢ်အိၣ်တၢ်ဆိးအလီၢ်န့ၣ်လီၤ. ပှၤသ့ၣ်တဖၣ်အံၤဘၣ်ဃ့ၢ်မှံဟးဖျိးခီဖျိလၢသုးအတၢ်မၤဆူးမၤဆါတၢ်မၤအၢမၤသီအဃိဒီးနၥ်၀ဲလၢအတၢ်ဟဲအိၣ်ဆိးဖဲအံၤကမ့ၢ်ဒၣ်ထဲတစိၢ်တလီၢ်ဖိ, ဘၣ်ဆၣ်အတၢ်အိၣ်ဆိးအံၤယံၥ်အါန့ၢ်အနံၣ်လၢအဆံလံန့ၣ်လီၤ.
ဒ်လၢကညီတ၀ၢကရူၢ်တဖၣ်အတၢ်မၤသကိးတၢ်လၢတၢ်မၤစၢၤတၢ်လၢဒဲက၀ီၤအံၤအဂီၢ်, အံသူၣ်ထၣ်ဒဲက၀ီၤကဘၣ်တၢ်ပတုၥ်အီၤဖဲ ၂၀၁၇နံၣ်မ့ၢ်လၢကျိၣ်စ့တၢ်ဆီၣ်ထွဲမၤစၢၤစှၤလီၤ၀ဲအဃိန့ၣ်လီၤ.
စီၤန့ၢ်သဘျ့, လၢအမ့ၢ်ပှၤနဲၣ်တၢ်အစၢၤလၢအမၤတၢ်လၢကညီ၀ဲၤဒၢးဘၣ်ဃးတၢ်မၤစၢၤဒီးမၤဂုၥ်ထီၣ်ပသီထီၣ်တၢ်ကရၢ (KORD) မၤလီၤတံၢ်လၢကညီတၢ်ကစီၣ်ပၥ်ဖျါဘၣ်ဃးကျိၣ်စ့မၤစၢၤတၢ်န့ၣ်ကအိၣ်တုၤက့ၤ၀ဲဖဲလါစဲးပထ့ဘၢၣ် ၂၀၁၇နံၣ်န့ၣ်လီၤ.
ကတိၤတၢ်ဒီးကညီတၢ်ကစီၣ်, စီၤန့ၢ်သဘျ့စံး၀ဲ.
“ပှၤဟ့ၣ်မၤစၢၤကျိၣ်စ့အခိၣ်သ့လၢအမ့ၢ်ထံၣ်ဘံၣ်စံၣ်, [The Border Consortium] ကရဲၣ်ကျဲၤတၢ်ဟ့ၣ်မၤစၢၤတၢ်တုၤလၢလါစဲးပထ့ဘၢၣ်(၂၀၁၇)နံၣ်- တၢ်တဲပှၤလၢလါစဲးပထ့ဘၢၣ်၀ံၤလီၢ်ခံ, တၢ်လီၤတံၢ်တအိၣ်လၢတၢ်ကဟ့ၣ်ကျိၣ်စ့မၤစၢၤလၢခါဆူညါအဂီၢ်ဒံးဧါန့ၣ်လီၤ.”
ထံၣ်ဘံၣ်စံၣ် (TBC) ဆှၢလီၤတၢ်မၤစၢၤဆူပှၤဘၣ်ကီဘၣ်ခဲဒဲက၀ီၤလၢအိၣ်လၢကီၢ်ကၠီၣ်တဲၣ်ဒီးကီၢ်ပယီၤအကီၢ်ဆၢဒီးတၢ်သ့ၣ်ညါစ့ၢ်ကီးလၢအမ့ၢ်ပှၤဟ့ၣ်မၤစၢၤတၢ်အခိၣ်သ့ၣ်မိၢ်ပှၢ်လၢဟ့ၣ်မၤစၢၤတၢ်အီၣ်တဖၣ်ဆူအံသူၣ်ထၣ်ပှၤလီၢ်အိၣ်ကမှံဖိတဖၣ်အဂီၢ်န့ၣ်လီၤ. ထံၣ်ဘံၣ်စံၣ်မၤသကိးတၢ်ဒီးဂံၢ်ခီၣ်ထံးကညီတ၀ၢကရၢတဖၣ်ဒ်သိးလၢကမၤစၢၤပှၤလီၢ်အိၣ်ကမှံဖိတဖၣ်အိၣ်ဘၣ်လၢဒဲက၀ီၤပူၤလီၤဒီးဒိးန့ၢ်ဘၣ်ဟုသးဒီးအံသၣ်, ဘၣ်ဆၣ်တၢ်မၤစၢၤကပတုၥ်ကွံၥ်အသးလၢခါဆူညါကျိၣ်စ့မၤစၢၤအသီတအိၣ်ကူကူလၢလၢဘၣ်န့ၣ်လီၤ.
စီၤလါဒိၣ်လၢအမ့ၢ်ပှၤဒဲက၀ီၤဖိဒီးမ့ၢ်စ့ၢ်ကီးကမံးတံးဖိတဂၤစံး၀ဲဒၣ်လၢကျိၣ်စ့တၢ်မၤစၢၤလၢခါဆူညါအဂီၢ်တအိၣ်လၢၤဘၣ်လၢပှၤလီၢ်အိၣ်ကမှံဖိတဖၣ်အဂီၢ်မ့ၢ်တၢ်လၢဒုးအိၣ်ထီၣ်တၢ်လီၤဘၣ်ယိၣ်န့ၣ်လီၤ.
“ဒဲက၀ီၤမ့ၢ်ပတုၥ်န့ၣ်, ပကဘၣ်က့ၤကဒါက့ၤလီၤ. ပှၤတနီၤပျံၤလၢကဘၣ်က့ၤကဒါက့ၤမ့ၢ်လၢပယီၤသုးတဖၣ်အိၣ်ဒံးလၢအတၢ်လီၢ်လၢအဃ့ၢ်ထီၣ်အလီၢ်. ပဟံၣ်ခဲလၢၥ်, ပတၢ်သူၣ်တၢ်ဖျးကရၢၢ်တဖၣ်ဒီးပစံၥ်ပျီတဖၣ်ဘၣ်တၢ်မၤဟးဂီၤအီၤ. ကမ့ၢ်တၢ်လၢအကီဒိၣ်မးလၢပဂီၢ်လၢပကဘၣ်က့ၤစးထီၣ်က့ၤတၢ်အိၣ်မူလၢအခီၣ်ထံးန့ၣ်လီၤ.”
တၢ်တၢၣ်ပီၣ်ကတိၤသကိးတၢ်ဒီးတၢ်ကတဲၥ်ကတီၤဃၥ်တၢ်တဖၣ်ဘၣ်တၢ်မၤအီၤလံလၢပှၤဟ့ၣ်မၤစၢၤကျိၣ်စ့တဖၣ်ဒီးဂံၢ်ခီၣ်ထံးကညီတ၀ၢကရၢတဖၣ်လၢအဘၣ်ဃးဒီးပှၤဃ့ၢ်မှံဟးဖျိးတ၀ၢဖိတဖၣ်အတၢ်က့ၤကဒါက့ၤဒီးတၢ်က့ၤဆီလီၤလီၢ်အိၣ်လီၢ်ဆိးတဖၣ်အဂီၢ်န့ၣ်လီၤ. ဖဲလါဒံၣ်စဲဘၢၣ် ၂၀၁၅နံၣ်န့ၣ်, တၢ်အိၣ်ကတဲၥ်ကတီၤသးကမံးတံၥ်တဖုဘၣ်တၢ်ဒုးအိၣ်ထီၣ်အီၤဒီးလၢပှၤတဖုအံၤအကျါတၢ်ဃုထၢထီၣ်ခၢၣ်စးတဂၤစုၥ်စုၥ်လၢဂံၢ်ခီၣ်ထံးကညီတ၀ၢကရၢတဖၣ်ဒီးလၢကညီဒီကလုၥ်စၢဖှိၣ်ကရၢပှၤဘၣ်မူဘၣ်ဒါတဖၣ်အကျါန့ၣ်လီၤ.
ဒ်လၢတၢ်ဂ့ၢ်ခီၣ်ထံးခီၣ်ဘိလၢအဟဲလၢတၢ်အိၣ်ကတဲၥ်ကတီၤသးကမံးတံၥ်ကရၢတဖၣ်အအိၣ်န့ၣ်, တၢ်မၤတၢ်လီၤသမံသမိးဃုသ့ၣ်ညါတၢ်ဘၣ်တၢ်မၤအီၤဒ်သိးလၢကခံကွၢ်စီၤကွၢ်ပှၤဃ့ၢ်မှံဟးဖျိးဖိတဖၣ်အတၢ်လိၣ်ဘၣ်, ဘၣ်ဆၣ်တၢ်ကျၢၢ်တံၢ်လၢတၢ်ကဘၣ်ကတိၤသကိးအီၤဒံးအါထီၣ်ဒ်သိးလၢတၢ်ကမၤတၢ်ဒုးအိၣ်ထီၣ်တၢ်ရဲၣ်တၢ်ကျဲၤလီၤတံၢ်လီၤဆဲးအဂီၢ်န့ၣ်လီၤ.
အံသူၣ်ထီၣ်ဒဲက၀ီၤဘၣ်တၢ်ဒုးအိၣ်ထီၣ်အီၤဖဲ၂၀၀၆နံၣ်လၢကညီသ၀ီဖိလၢအအိၣ်လၢတီအူဒီးချၢၣ်လွံၢ်ထူၣ်ကီၢ်ရ့ၣ်တဖၣ်အပူၤဘၣ်ဃ့ၢ်ထီၣ်ကွံၥ်လၢဒူသ၀ီပူၤခီဖျိလၢပယီၤသုးထီၣ်ဒုး၀ဲကညီသုး [KNLA] လၢကီၢ်ရ့ၣ်ခံဘ့ၣ်အပူၤန့ၣ်လီၤ. ပယီၤသုးအတၢ်မၤဒၢၣ်တၢ်တဖၣ်အံၤတၢ်နၥ်၀ဲလၢကဘၣ်ထွဲဒီးတၢ်လီၢ်အတၢ်ဘံၣ်တၢ်ဘၢလၢတၢ်ကသူၣ်ထီၣ်သုးမီၤစိရိၤအ၀့ၢ်ခိၣ်အသီ, န့ၤပၠံၣ်ဒီၤန့ၣ်လီၤ.