ဖဲလါအီးကထိဘၢၣ် ၃သီ, ပမၤလၤကပီၤဒီးသးခုဃုၥ် Sally Thompson လၢအမ့ၢ်ထံၣ်ဘံၣ်စံၣ်အပှၤနဲၣ်တၢ်အခိၣ်လီၢ်လံၤတဂၤလၢဘၣ်တၢ်ထံၣ်သ့ၣ်ညါပၥ်ပနီၣ်ဟ့ၣ်လၤကပီၤအီၤလၢ စီၤပၤခၠါလစ် ၃ ဂၤတဂၤလၢအမ့ၢ်၀ဲ Officer of the Order of the British Empire (OBE) ခီဖျိလၢအမၤစၢၤပှၤဂ့ၢ်၀ီလိၣ်ဘၣ်တၢ်မၤစၢၤလၢကီၢ်ကၠီၣ်တဲၣ်ဒီးကီၢ်ပယီၤကီၢ်ဆၢန့ၣ်လီၤ.
စဲလံၣ်ထီမ်စၢၣ်န်မၤတ့ၢ်လံတၢ်အိၣ်လံလၢအနံၣ်သၢဆံၣ်ဘျဲၣ်လၢအမၤစၢၤပှၤလီၢ်အိၣ်ကမှံဖိလၢအဟဲလၢကီၢ်ပယီၤတဖၣ်. တၢ်လၢအဒိးန့ၢ်ဘၣ်တၢ်လၢကပီၤအံၤန့ၣ်စဲလံၣ်ထီမ်စၢၣ်ထံၣ်သ့ၣ်ညါ၀ဲလၢတၢ်မၤအံၤကဲထီၣ်သးတသ့ဘၣ်မ့တမ့ၢ်ဘၣ်လၢလီၢ်က၀ီၤကရၢတဖၣ်အတၢ်ဟ့ၣ်လီၤသးဒီးမၤသကိးတၢ်လၢအိၣ်ဒီးတၢ်ဂဲၤပျုၢ်ဂဲၤဆှးနီၢ်နီၢ်လၢတၢ်မၤစၢၤတၢ်တဖၣ်အဖီခိၣ်ဒီးပှၤသ့ၣ်တဖၣ်အံၤမ့ၢ်ပှၤသ့ၣ်တဖၣ်လၢအမ့ၢ်တၢ်မၤအပီးလီလၢအကါဒိၣ်မးလၢတၢ်မၤစၢၤတၢ်အဂီၢ်န့ၣ်လီၤ. စဲလံၣ်ထံၣ်သ့ၣ်ညါစ့ၢ်ကီး၀ဲလၢတနံၤဘၣ်တနံၤတၢ်လီၤဘၣ်ယိၣ်တဖၣ်လၢပှၤမၤစၢၤတၢ်ဖိတဖၣ်ဘၣ်မၤ၀ဲလၢကီၢ်ပယီၤအပူၤ, “ယတူၢ်လိၥ်တၢ်ဟ့ၣ်ယၤတၢ်လၤကပီၤလၢယဒိးန့ၢ်ဘၣ်အံၤလၢတၢ်ထံၣ်သ့ၣ်ညါပၥ်ပနီၣ်ထံၣ်ဘံၣ်စံၣ်ပှၤမၤတၢ်ဖိတဖၣ်ဒီးပလီၢ်က၀ီၤပှၤမၤသကိးတၢ်ကရၢခဲလၢၥ်လၢအဟ့ၣ်လီၤသးလၢတၢ်လီၤဘၣ်ယိၣ်ကိးမံၤဒဲးအပူၤဒ်သိးလၢကဆီၣ်ထွဲမၤစၢၤအ၀ဲသ့ၣ်အပှၤဃ့ၢ်မှံဟးဖျိးတ၀ၢဖိတဖၣ်လၢဘၣ်ကွၢ်ဆၢၣ်မဲၥ်ဒီးတၢ်မၤပျံၤမၤဖုးခီဖျိလၢပယီၤသုးအတၢ်ဟူးတၢ်ဂဲၤတဖၣ်လၢအကဲထီၣ်သးလၢကတၢၢ်ကတၥ်တသ့ဘၣ်တဖၣ်.”
တၢ်ထံၣ်သ့ၣ်ညါပၥ်ပနီၣ်အ၀ဲအံၤန့ၣ်မ့ၢ်တၢ်အၢၣ်လီၤအီလီၤတခါလၢစဲလံၣ်ထီမ်စၢၣ်အတၢ်ဟ့ၣ်လီၤသးကျၢၤမုဆှုဆူပှၤဘၣ်ကီဘၣ်ခဲဖိတဖၣ်, ဃုၥ်ဒီးပှၤသ့ၣ်တဖၣ်လၢအသးစွံကတုၤလၢတၢ်ဂဲၤပျုၢ်ဂဲၤဆှးလၢကဆီတလဲပှၤလၢဘၣ်ကွၢ်ဆၢၣ်မဲၥ်ဒီးတၢ်အိၣ်သးနးနးကျံၤကျံၤတဖၣ်. လၢတၢ်သးဒီဖျၢၣ်အပူၤပပၥ်ဖျါထီၣ်ပတၢ်သးခုဃုၥ်ဒီးစဲလံၣ်ထီမ်စၢၣ်ဒီးလီၢ်က၀ီၤပှၤတ၀ၢကရၢအါဖုလၢအမၤသကိးတၢ်တဖၣ်.